Gianmarco no l’é stat bon de venjer

Da VallediFassa.com il 9 febbraio 2016

Questo articolo è già stato letto 31966 volte!

L’azident co l’auto sozedù en sabeda sera su la strèda per Belamont ge à costà la vita al joen Gianmarco Sommariva de 19 egn. L’era l fi de Cristina Marchetti, redatora de La Usc de Fascia.

L’azident era sozedù en sabeda sera, entorn les 11. L’auto sportif vidà da Luca Bortoluzzi de 42 egn con su 3 joegn de 19 egn, jia da Pardac su envers l Role con chela de jir e festejèr l carnascèr, canche su na utèda, fosc percheche l jìa massa debel, l’é jit fora de strèda. Per doi di joegn, per grazia, l’azident no é stat tant grief, ma per Gianmarco Sommariva i socoridores à vedù sobito che la situazion era desperèda.Gianmarco (desché Bortoluzzi, che no l’é amò fora pericol) l’é stat portà a l’ospedèl Sènta Chiara de Trent, olache per passa 24 ores i genitores, l fra Matteo, i parenc e n muion de amisc à sperà e preà che l posse esser più fort e aer la venta sui colpes al cef e ence al piet che l’aea ciapà. Ma no la é jita coscì. Anché lunesc, entorn mesdì, sie cher se à fermà per semper.

Student del 5° an al Liceo Artistich de Poza, Gianmarco l’era n tous gustégol e algegher, sportif e pien de voa de viver, n amich e n pont de referiment per n muie de joegn, che i à empienì facebook de messajes, pensieres, recorc e retrac.

Canche l Segnoredie se porta demez n joen tel fior di egn l’é senester se n fèr na rejon. Resta demò la speranza che amàncol chesta tragedies les posse ge servir a zachei de etres: i fèr pissèr, stèr ascorc, entener l gran valor de la vita.

Gianmarco l’era l fi de Cristina Marchetti, redatora de La Usc de Fascia: se strenjon apede ela, perché perder n fi l’é l dolor più gran che posse esser per na mère, e ence a duta sia familia. L’é senester troèr la paroles.

L’ùltim don de Gianmarco l’é stat chel de donèr si orghegn: i genitores à consentì a la donazion, descheche el aessa volù, acioche amàncol zachei de etres posse viver, o viver miec, de gra a el.

I Comuns de Moena e de Vich, olache Gianmarco l’aea stat e l stajea ades, i à descancelà o sburlà la scomenzadives da carnascèr pervedudes per mèrtesc gras. Doman da sera da les 8 vegnarà dit sù l rosèr tant te capela de Vich che te gejia de Sèn Vile a Moena. La sepoltura de Gianmarco sarà en jebia ai 11 te gejia de Sèn Vile da la does domesdì.

(lausc.it)